Misnotkun lyfseðilsskyldra lyfja er faraldur á Íslandi, líkt og kemur fram í fyrsta myndbandinu sem Minningarsjóður Einars Darra gaf út í dag.

Í því er rætt við Kristján Erni Björgvinsson og Jóhönnu Björt Grétarsdóttur, sem bæði eru 19 ára nemar, Jón Magnús Kristjánsson yfirlækni og Hrönn Stefánsdóttur hjúkrunarfræðing á bráðalækningadeild á Landspítalanum, Arnór Huga Sigurðsson 20 ára kokkanema, Gísla Björnsson yfirmann sjúkraflutninga á Heilbrigðisstofnun Vesturlands og Ragnar Jónsson lögreglufulltrúa í Reykjavík.

„Þessum útköllum fjölgar stöðugt, það virðast fleiri og fleiri lenda í vanda með þetta og það sem við vissum varla af fyrir tiltölulega fáum árum síðan virðist nánast að verða daglegt brauð hjá okkur,“ segir Gísli Björnsson.

„Þetta er svo skeirí, þú átt ekki að þurfa að vera búinn að missa tvo góða vini þína á sex mánuðum, það er ekki í lagi,“ segir Kristján Ernir.

„Við þurfum þjóðarátak til að hindra það að unga fólkið okkar deyi,“ segir Ragnar Jónsson lögreglufulltrúi.

Myndbandið er það fyrsta af nokkrum sem Minningarsjóður Einars Darra mun gefa út.