Það var Covid sem gerði það að verkum að ríkisstjórn Katrínar Jakobsdóttur hélt velli í þingkosningunum 2021. Vinstri kjósendur voru mjög ósáttur við að VG færu í ríkisstjórn með Sjálfstæðisflokknum og varð það til þess að VG hefur tapað miklu fylgi. Ólafur Þ. Harðarson, stjórnmálafræðiprófessor, segir það augljóst að frambjóðandi sem stígi beint úr stól forsætisráðherra í forsetaframboð sé fulltrúi valdsins. Þessir þættir saman hafi orðið til þess að draga úr persónuvinsældum Katrínar Jakobsdóttur. Ólafur er gestur Ólafs Arnarsonar í sjónvarpsþætti á Eyjunni í aðdraganda forsetakosninga. Þáttinn má nálgast hér á Eyjunni, á hringbraut.is og á Hringbrautarrás Sjónvarps Símans. Einnig má hlusta á hann sem hlaðvarp.
Eyjan - Olafur Hardarson - forsetakosningar 2.mp4
„Augljóslega, kandídat sem kemur beint úr stóli forsætisráðherra er náttúrlega stimplaður sem fulltrúi valdsins. Ég held að það séu samt aðrir þættir sem skipta meira máli og þeir eru bara pólitískir. Það held ég að sé bara það að Katrín myndaði stjórn með Sjálfstæðisflokknum 2017. Það líkaði mjög mörgum vinstri mönnum mjög illa. Stuðningsmenn Katrínar segja auðvitað: Það voru engir aðrir kostir í stöðunni og það þurfti að ná stöðugleika, og það er ýmislegt til í því, en margir vinstri menn vildu frekar að það yrði mynduð fjögurra eða fimm flokka stjórn miðju- og vinstri flokka,“ segir Ólafur.
HB_EYJ107_NET_OlafurHArdarson.mp4
„Hvort að það var raunhæft er alveg spurning, en alla veganna þá líkaði mörgum vinstri mönnum þetta illa. Ég vissi náttúrlega og sagði 2017 að þessi stjórnarmyndun, án þess að taka afstöðu til þess hvort hún væri skynsamleg eða ekki, að þá væri hún ávísun á fylgistap Vinstri grænna í kosningum, af því að maður vissi það af reynslu hérlendis og erlendis að vinstri sósíalistaflokkur sem fer í stjórn með miðjuflokki eða hægri flokki, hann er líklegur til að tapa fylgi af því að hans kjósendur, kjósendur vinstri sósíalista, eru nú oft með svona „hreinar“ hugsanir og ekki mjög mikið fyrir að vera að makka við einhverja aðra flokka sem eru lengra til hægri.“
Ólafur segir þetta hafa gengið eftir 2021, þó að ríkisstjórnin hafi haldið velli, sem sé einsdæmi eftir hrun. „Hún bætti við sig, sem er fágætt í íslenskri pólitík, bætti samanlagt við sig.“ Hann segir þá fylgisaukningu eingöngu hafa komið til vegna kosningasigurs Framsóknar þar sem Sjálfstæðisflokkurinn stóð í stað og Vinstri grænir töpuðu fylgi, fóru úr 17 prósentum niður í 12-13 prósent. „Þannig að það gekk eftir að vinstri kjósendur voru ekki ánægðir með þetta.“
Hann segir fyrst hafa farið verulega að halla undan fæti hjá Vinstri grænum eftir að stjórnarsamstarfið var endurnýjað 2021 og Katrín hélt áfram í stjórn með Sjálfstæðisflokknum. „Það var að vísu freistandi, kannski, að halda áfram eftir að stjórnin hafði bætt við sig með þessum einstæða sigri en það sem var líka að gerast þarna 2021 var að við vorum að komast út úr Covid og sigur stjórnarinnar 2021 var nú fyrst og fremst, eins og ég og félagar mínir í kosningarannsókninni skýrum út í nýrri bók um kosningarnar 2021 sem kemur út í haust, að það var í raun og veru Covid sem gerði það fyrst og fremst að verkum að stjórnin hélt velli.“
