Orðið á götunni er að lifandi dauð vinstri stjórn Katrínar Jakobsdóttur sé ekki á förum fyrr en á næsta ári. Lögbrot Svandísar munu engu breyta. Fyrir því eru tvær meginástæður.
Í fyrsta lagi er á það bent að frá hruni hafa hvorki meira né minna en sjö ráðherrar úr fjórum flokkum gerst lögbrjótar í embættisfærslum sínum: Svandís og Ögmundur, Vinstri græn, Jóhanna Sigurðardóttir, Samfylkingu, Lilja Alfreðsdóttir, Framsókn, og sjálfstæðismennirnir Hanna Birna, Sigríður Andersen og Bjarni Benediktsson, sjálfur flokksformaðurinn. Brot á jafnréttislögum eru algengust. Einungis Hanna Birna og Sigríður hafa hrökklast úr ríkisstjórnum vegna lögbrotanna.
Orðið á götunni er að staða þeirra sem hafa gerst brotlegir sé fráleitt góð að hneykslast á lögbrotum Svandísar, þótt ítrekuð séu. „Sá yðar sem syndlaus er kasti fyrsta steininum…“
Í annan stað gera hörmungarnar í Grindavík það að verkum að fátt annað mun komast að á vettvangi stjórnmálanna á næstunni en að fást við afleiðingar þeirra.
Því mun athyglin beinast frá misgjörðum Svandísar sem situr sem fastast og glottir framan í þá sem gagnrýnt hafa hana harðlega.
Orðið á götunni er að Bjarni Benediktsson muni verja ríkisstjórnina áföllum. Hann er ekki að hætta sem formaður og mun taka slaginn fyrir flokkinn í næstu kosningum. Á honum verður fyrst fararsnið eftir tvö ár þegar hann tekur við sendiherraembættinu í Washington sem sparivinkona hans, Svanhildur Hólm, heldur volgu fyrir hann þangað til.
Orðið á götunni er að margir hafi sannfærst um þessi áform þegar Bjarni þáði loks stórkross Fálkaorðunnar í síðasta mánuði, heilum sex árum eftir að hann lét af embætti forsætisráðherra eftir nokkra mánuði í stólnum.
Þeir sem þekkja til í utanríkisþjónustunni vita að sendiherra sem skartar ekki orðu í stórum veislum virðist aumur. Lítur nánast út fyrir að vera fáklæddur – allt að því nakinn!
Orðið á götunni er að þannig ætli Bjarni Benediktsson ekki að koma fram fyrir hönd þjóðarinnar þegar honum verður boðið í Hvíta húsið í embætti sendiherra Íslands í Bandaríkjunum. Hann muni skarta orðunni góðu fyrir Trump.
