Peningastefnunefnd Seðlabanka Íslands hefur ákveðið að halda vöxtum bankans óbreyttum. Meginvextir bankans, vextir á sjö daga bundnum innlánum, verða því áfram 9,25%.

Í tilkynningu frá Seðlabankanum kemur fram að verðbólga hafi minnkað lítillega milli mánaða í október og mældist hún 7,9%. Þá hafi undirliggjandi verðbólga einnig hjaðnað. Áfram séu vísbendingar um að tekið sé að hægja á einkaneyslu og fjárfestingu.

„Samkvæmt nýrri spá Seðlabankans hafa verðbólguhorfur þó versnað. Spennan í þjóðarbúinu hefur reynst meiri en áður var talið og gengi krónunnar hefur lækkað. Verðbólguvæntingar hafa jafnframt haldist háar og kostnaðarhækkanir virðast hafa meiri og langvinnari áhrif á verðbólgu en áður,“ segir í tilkynningunni.

Þar segir enn fremur að þótt áhrif vaxtahækkana undanfarin misseri séu að koma skýrar fram bendi verri verðbólguhorfur til þess að það gæti þurft að herða taumhald peningastefnunnar enn frekar.

„Þrátt fyrir það hefur peningastefnunefnd ákveðið að halda vöxtum óbreyttum að sinni í ljósi þeirrar óvissu sem ríkir um efnahagsleg áhrif jarðhræringa á Reykjanesi. Mótun peningastefnunnar á næstunni mun sem fyrr ráðast af þróun efnahagsumsvifa, verðbólgu og verðbólguvæntinga.“