Morgunblaðið skýrir frá þessu í dag. Segir blaðið að samkvæmt nýrri spá bankans sé reiknað með 800 þúsund ferðamönnum til landsins á árinu en þjóðhagsspá hans, sem var gefin út í október á síðasta ári, spáði hann því að þeir yrðu um 600 þúsund.
Útflutningstekjur ferðaþjónustunnar voru 117 milljarðar á síðasta ári en Landsbankinn spáir því að þær verði 236 milljarðar á þessu ári. Haft er eftir Gústaf Steingrímssyni, hagfræðingi hjá Landsbankanum, að ef ferðamennirnir verða 650 þúsund en ekki 800 þúsund verði tekjurnar 41 milljarði lægri. „Það er auðvitað erfitt að spá nákvæmlega um þetta, en við teljum að gosið í Geldingadölum hafi töluverð áhrif. Gosið hefur minnt erlenda ferðalanga rækilega á Ísland sem áfangastað og við teljum að það verði töluverð umferð af fólki sem vill koma og sjá gosið á meðan það varir. Þetta er meginástæða þess að við hækkuðum spá okkar upp í 800 þúsund,“ er haft eftir honum.
