Jón Gunnarsson, nýr innanríkisráðherra, hyggst leggja fram tvö frumvörp í janúar er varða meðferð sakamála og forvirkar rannsóknarheimildir lögreglunnar. Þetta kemur fram í þingmálaskýrslu ríkisstjórnarinnar sem var birt í gær.

Fréttablaðið skýrir frá þessu. Annað frumvarpið er um breytingar á lögreglulögum en hitt um meðferð sakamála.

Frumvarpið um breytingar á lögreglulögum fjallar um aðgerðir til að koma í veg fyrir brot, forvirkar rannsóknarheimildir. Markmiðið með því er að „skýra heimildir lögreglu til að grípa til ráðstafana í þágu afbrotavarna“ segir í þingmálaskránni. Þessar heimildir varða sérstaklega skipulagða brotastarfsemi, brot eða athafnir sem geta raskað öryggi borgara og ríkisins, netárásir og fleiri tegundir brota.

Jón mun samhliða þessu frumvarpi leggja til að lögum um meðferð sakamála verði breytt, meðal annars ákvæði um lengd gæsluvarðhalds og aðgang að gögnum.