Birgir Þórarinsson var kjörinn þingmaður Miðflokksins í alþingiskosningunum í september en hann ákvað að segja skilið við flokkinn og ganga þess í stað til liðs við Sjálfstæðisflokkinn. Þessi ákvörðun Birgis hefur vakið mikla athygli og um leið hefur hún verið afar umdeild.
Sigmundur Davíð Gunnlaugsson, formaður Miðflokksins, var gestur Kristjáns Kristjánssonar í Sprengisandi á Bylgjunni í dag og þar ræddu þeir um þessa ákvörðun Birgis. Á meðal þess sem þeir ræddu var hvernig Birgir tjáði formanni sínum að hann ætli að skipta yfir í annan flokk korteri eftir kosningar.
„Mér skilst að hann hafi rætt þetta eitthvað við þig. Það kom fram hjá honum að hann hefði átt einhver samtöl við þig og kynnt þig þessa ákvörðun,“ segir Kristján.
Sigmundur segir þá hvernig Birgir sagði honum frá ákvörðuninni. „Hann sagði mér bara frá þessu fyrir utan Útvarp Sögu, eftir viðtal þar,“ segir Sigmundur. „Er það sem sagt samtalið sem fór fram á milli ykkar, já svona bara by the way, ég er hættur?“ spyr Kristján þá. „Já, við fórum svo á smá rúnt í bílnum hjá honum en já, þetta gerðist svona“
Kristján veltir því þá fyrir sér hvort Sigmundur hefði ekki getað haft áhrif á Birgi sem formaður flokksins. „Ég var náttúrulega ennþá að vonast til þess að hann myndi endurskoða þessa ákvörðun sem hefur örugglega verið of seint á þessum tímapunkti, ég hugsa að hann hafi verið búinn að undirbúa viðtal í Morgunblaðinu og hvað eina,“ segir Sigmundur.
„En ég bara bað hann um að leyfa gagnrýnendum sínum að hafa ekki rétt fyrir sér, því það hafa ýmsir haft efasemdir um að hann myndi alveg standa með okkur.“