Morgunblaðið skýrir frá þessu. „Við teljum mikilvægt að í samgöngum til og frá Eyjum séu bæði ferja og flug. Því er mjög miður að forsvarsmenn Icelandair hafi ákveðið að hætta flugi hingað. Ég tel það vera á ábyrgð ríkisins að tryggja eðlilega og góðar samgöngur milli lands og Eyja,“ er haft eftir Írisi.
Icelandair hóf áætlunarflug til Eyja skömmu fyrir síðustu jól og tók þá við því af flugfélaginu Erni sem hafði haldið því uppi um tíma en taldi ekki grundvöll fyrir áframhaldi. Nú er sama staða komin upp hjá Icelandair. Þegar mest var í sumar var flogið átta sinnum í viku á milli lands og Eyja en í ágúst hafa ferðirnar verið fimm í viku.
„Við sáum fram á að eftirspurn stæði ekki undir flugi til Vestmannaeyja í september. Ákváðum því að ljúka sumaráætlun okkar mánuði fyrr en áformað var, í lok ágúst í stað september. Flugið gekk ágætlega í sumar en við höfðum þó væntingar um meiri eftirspurn og teljum að margir samverkandi þættir hafi haft þar áhrif. Við bjuggumst til dæmis við að heimamenn í Eyjum nýttu sér þjónustuna í meira mæli í sumar en raunin varð,“ er haft eftir Ásdísi Ýr Pétursdóttur, upplýsingafulltrúa Icelandair.
