Sakavottorð eru nú aðgengileg rafrænt í gegnum vefsíðuna Ísland.is. Sakavottorð þetta er svokallað einkavottorð sem staðfestir að ekkert brot sé í sakaskrá þinni.

„Að sakavottorð séu komin á rafrænt form gerir t.d. skrefin léttari þegar sótt er um nýtt starf og er einn þáttur í einfaldari samskiptum við ríkið,“ er haft eftir Áslaugu Örnu Sigurbjörnsdóttur dómsmálaráðherra í tilkynningu á vef Stjórnarráðsins.

Til að sækja vottorð þarftu að skrá þig inn með rafrænum skilríkjum og samþykkja öflun gagna úr sakaskrá.  Þú þarft þó enn að greiða fyrir vottorðið, líkt og áður. Þegar vottorð hefur verið greint þá berst það þér í pósthólfið þitt á Ísland.is auk kvittunar.

Dómsmálaráðherra deildi tíðindunum á Facebook þar sem hún kvað þetta enn einn þáttinn í því að einfalda samskipti stjórnvalda við fólkið í landinu.  Fyrir skömmu var opnað fyrir umsóknir um rafrænt ökuskírteini og verður fróðlegt að sjá hvað rafræn bylting stjórnsýslunnar færir okkur næst.