„Mér hafa borist þau ánægjulegu tíðindi að í sýni mínu væru engin merki um coronaveiru,“ segir Katrín jakobsdóttir, forsætisráðherra, í stöðufærslu á Facebook í dag. Í gær greindi hún frá því að hún hefði þurft að fara í sjálfskipaða sóttkví þar sem smit hefði greinst í skóla sonar hennar.

„Ég mun því halda ótrauð áfram í að vinna að því að við hér á Íslandi og samfélagið allt komumst vel í gegnum þennan skafl. Það er mér mikils virði að finna fyrir þeirri samvinnu og þeim samhug í samfélaginu öllu sem er mikilvægt að finna fyrir á svona skrýtnum tímum. Á laugardaginn kynnti ríkisstjórnin stærstu efnahagslegu aðgerðir í sögu landsins. 230 milljarða aðgerðarpakki til að spyrna við þessum fordæmalausu aðstæðum. Þær eru mikilvægar. Mikilvægast er að við gerum þetta saman. Að auki vil ég ég þakka ykkur öllum fyrir hlýjar kveðjur, mér þykir vænt um þær. Sendi ykkur sömuleiðis mínar allra bestu kveðjur. K“