Cristiano Ronaldo undirbýr sig þessa dagana fyrir sitt sjötta Heimsmeistaramót með portúgalska landsliðinu og virðist unnusta hans, Georgina Rodríguez, vera í toppformi með honum.

Ronaldo, sem verður 41 árs á árinu, stefnir á að leiða Portúgal á HM í Bandaríkjunum, Kanada og Mexíkó næsta sumar. Framherjinn hefur lengi verið þekktur fyrir gríðarlega agaðan lífsstíl og strangt æfingakerfi sem hefur gert honum kleift að halda áfram á hæsta stigi langt fram eftir aldri.

Georgina Rodríguez, sem er 32 ára gömul fyrirsæta og áhrifavaldur, hefur einnig verið dugleg að æfa undanfarna mánuði. Hún birti nýlega myndir úr myndatöku fyrir strandfatamerkið Calzedonia þar sem hún sýndi árangurinn af hörðum æfingum í hnefaleikum og líkamsrækt.

Parið kynntist þegar Georgina starfaði í Gucci-verslun og Ronaldo lék með Real Madrid. Þau trúlofuðu sig í ágúst á síðasta ári og eiga saman stóran barnahóp.

Fjölskyldan verður með Ronaldo á meðan Heimsmeistaramótið stendur yfir og er búist við að hún verði með aðsetur í Miami á milli leikja Portúgals.

Ronaldo á möguleika á að bæta enn frekar við einstakan feril sinn á HM. Hann er eini karlkyns leikmaðurinn sem hefur skorað á fimm Heimsmeistaramótum og gæti nú skrifað nýjan kafla í sögubækurnar á sínu sjötta móti.

Þá gæti enn á ný komið til stórviðureignar milli Ronaldos og Lionel Messi sem einnig stefnir á sitt sjötta heimsmeistaramót með Argentínu.