Eigandi Herrahússins, Sverrir Bergmann, ritar opið bréf til borgarstjóra í Morgunblaðið í dag þar sem hann lýsir því hvers vegna hann kaus að flytja verslun sína frá Laugavegi og upp í Ármúla:

„Ég neyddist til þess að loka verslun minni, Herrahúsinu, á Laugavegi 47, hinn 24. febrúar 2019 og flytja hana í annan borgarhluta. Ástæða lokunarinnar var heft aðgengi að götunni, endalausar lokanir vegna byggingaframkvæmda og síðast en ekki síst sú ákvörðun ykkar sem skipið meirihluta borgarstjórnar Reykjavíkur að loka fyrir alla bílaumferð um Laugaveginn, allt árið um kring,“ skrifar Sverrir í bréfi sínu til borgarstjóra.

Sverrir segir að þetta hafi verið stór ákvörðun því verslunin hafi starfað í póstnúmeri 101 samfellt frá árinu 1965. Sverrir segir:

„Hvernig dettur mönnum í hug að hægt sé að reka herrafataverslun við lokaða götu á Íslandi, allt árið um kring, í þeirri veðráttu sem hér er? Það er ekki hægt að bera saman veðráttuna hér og t.d. í Kaupmannahöfn, því hér er hún svo miklu verri. Hvaða veruleikafirring er í gangi?“

Sverrir segir að umsnúningur hafi orðið í rekstri verslunarinnar eftir flutninginn frá Laugavegi upp í Ármúla. Veltuaukningin á síðasta ári hafi verið 55%. Ástæðan sé augljós:

„Ánægja viðskiptavina minna er ósvikin. Fólki finnst frábært að þurfa ekki að fara niður á Laugaveg.“

Í lok greinar sinnar þakkar Sverrir Degi borgarstjóra fyrir að hafa hrakið sig af Laugaveginum. Það sé það besta sem hafi hent hann á viðskiptasviðinu í mörg ár.