Áslaug Arna Sigurbjörnsdóttir, dómsmálaráðherra, tjáði sig um merki lögreglu sem hafa verið mikið í umræðunni. Mynd af lögregluþjóni með fánamerki sem hafa verið tengd við hvíta þjóðernishópa og nýnasista olli miklu umtali í gær, en í kvöldfréttum Stöðvar 2 sagði Áslaug mikilvægt að lögregla bæri ekki merki sem gæfu eitthvað misjafnt til kynna.

„Það er mikilvægt að lögreglan sé ekki merkt með neinum hætti sem gefur eitthvað til kynna að þau séu ekki til þjónustu fyrir alla þá sem hér búa. Og það er mikilvægt að við fylgjum því eftir og það verður gert, hvort sem þörf er á aukinni fræðslu eða menntun eða annað,“

Þegar að Áslaug var spurð hvort að umræðan hafi verið óvægin í garð lögreglu svaraði hún játandi og hélt því fram að kynþáttahyggja grasseraði ekki innan embættisins.

„Já, auðvitað tel ég ekki að það sé grasserandi kynþáttahyggja innan lögreglunnar hér á landi en ég tel aftur á móti að við þurfum alltaf að læra af þessu því við munum alltaf fordæma hvers konar haturstákn eða orðræðu sem upp kemur og við getum lært af þessu og skilið hvernig fólk upplifir þessi tákn og hvað þau merkja,“

Þá sagði hún að umfjöllunin um merki hefðu opnað augu margra um þýðingu merkja og hvaða skilaboð þau geta sent.

„En þetta hefur kannski opnað augu margra fyrir hvað tákn merkja, hvaða skilaboð þau gefa og hvað þau þýða fyrir annað fólk sem lögreglan er að þjóna,“