Björgvin G. Sigurðsson skrifar:
Mikil og hröð styrking krónunnar hefur grafið undan útflutningsgreinum okkar og skyndilega eru blikur á lofti í ferðaþjónustunni. Gengisbreytingarnar koma harkalega niður á greininni sem á sama tíma hefur verið í fordæmislausum uppbyggingarfasa, til að mæta auknum gestakomum til landsins.
Hæstu vextir í heimi og ófyrirsjáanlegar sveiflur örmynntarinnar herða að helstu vaxtargrein landsins, og ekki síst landsbyggðarinnar sem loks fékk tækifæri til fjölbreyttrar atvinnusköpunar í kringum ferðaþjónstuna. Ofan í slíka þróun er ekki skynsamlegt að hækka virðisaukaskattinn á greinina. Þó rök geti mögulega staðið til slíkra breytinga síðar, þegar jafnvægi og stöðugleiki hafa náðst eftir tímabil uppbyggingar og breytinga.
Í stað þess að tala með herskáum hætti um ferðaþjónustuna ættu stjórnvöld að standa með greininni og bakka hana upp. Ekki síst á meðan hún er að festa sig í sessi sem helsti atvinnuvegur landsins og sá sem skilar lang mestum gjaldeyri til þjóðarinnar.
Það eru góðar og gildar ástæður fyrir því að grannþjóðir okkar hafa í áratugi lagt lægra hlutfall virðisauka á ferðaþjónustuna. Þær helstar að jafna samkeppnisstöðu greinarinnar sem keppir hart um athygli ferðamanna.
Þá fylgja ferðaþjónustunni mörg og fjölbreytt tækifæri til nýsköpunar, hvort heldur er í sambandi við gistisölu, matreiðslu eða menningu. Sprotarnir eru óteljandi og fjöldi einyrkja um land allt sem nú sér fram á mögueika til þess að skapa sóknarfæri og ný störf.
Því er einboðið að fresta áformum um hækkun virðisaukaskatts á ferðaþjónustuna. Það þarf að kortleggja áhrif þess miklu betur, enda virtist fjármálaráðherrann ekki búa yfir sannfærandi rökum um þessar breytingar nú þegar greinin stígur krappan dans út af krónunni. Sérstaklega ekki þegar horft er til samanburðar í öðrum löndum.
