„Ég hef aldrei haft neinar sérstakar áhyggjur af slettum – þær koma og fara. […] Þegar krakkar eru hins vegar byrjaðir að tala saman og leika sér á ensku, þá erum við komin á allt annað stig,“ segir Eiríkur Rögnvaldsson, prófessor í íslensku við Háskóla Íslands í samtali við Morgunblaðið. Haft var eftir grunnskólakennara í Hafnarfirði að margir nemendur í skólanum hafi samskipti sín á milli með því að tala ensku. Sérfræðingar telja að snjallsímar og afþreyingarveitur veiki stöðu íslenskunnar. Segir í leiðara Morgunblaðsins að þjóðararfinum sé ógnað.

Kennarinn í Hafnarfirði telur ekki öruggt að íslenskan muni lifa af þessa ógn sem hún stendur frammi fyrir.

„Þetta eru ekki aðeins unglingar, ég hef líka tekið eftir þessu með yngri nemendur. Það skal tekið fram að þetta eru ekki allir nemendur en einhverjir hópar,“ sagði kennarinn og bætti við að hann hefði fyrst tekið eftir því fyrir tveimur eða þremur árum að unglingar væru byrjaðir að tjá sig á ensku. Þá séu þetta ekki enskuskot heldur samræður á ensku.

„Í samræðum mínum við grunnskólakennara í öðrum skólum hefur komið í ljós að þetta á sér stað víða, þ.e. í mörgum skólum [ … ] „Jú, sérfræðingar vilja meina að íslenskan lifi þetta ekki af, þ.e. skortinn á íslensku efni á netinu. Það þarf að íslenskuvæða netið eins og hægt er en til þess þarf verulega mikla fjármuni og pólitískan vilja. Það getur verið að það sé orðið of seint.“

Sigrún Birna Björnsdóttir, formaður stjórnar Samtaka móðurmálskennara tjáir sig einnig við Morgunblaðið og segir mikilvægt að fullorðnir sýni móðurmálinu virðingu og ali börn sín eftir því.

„Við verðum öll að leggjast á eitt og bera virðingu fyrir þessari menningararfleifð sem tungumálið er.“