Kvikmyndagerðarmaðurinn og rithöfundurinn Þráinn Bertelsson er byrjaður að láta að sér kveða á Facebook á ný eftir nokkurt hlé. Í dag kemur hann Steingrími J. Sigfússyni til varnar. Nokkuð hefur borið á gagnrýni á þau áform Steingríms að gefa áfram kost á sér fyrir Vinstrihreyfinguna grænt framboð og framlengja þannig enn lengur áratuga þingsetu sína.

 Sjá einnig: Steingrímur J. leiðir VG í Norðausturkjördæmi

Það eru margir að segja ljótt um Steingrím J. í tilefni þess að hann ætlar að sitja áfram á þingi. Það er sjálfsagt hægt að finna eitthvað ljótt til að segja um alla menn, en við Steingrímur höfum verið góðir vinir lengur en hann hefur setið á þingi, sem sagt í langan tíma, og hann er sjaldgæfur öðlingur og ágætismaður og auk þess þverhaus og vinnuþjarkur,

segir Þráinn um Steingrím en eins og kunnugt er sat Þráinn um tíma á þingi fyrir VG eftir hrun.

 „Ég skil hann vel að vilja áfram taka þátt í því að smáflokkurinn sem hann stofnaði skuli nú í skoðanakönnunum mælast vera stærsti stjórnmálaflokkur Íslands. Hvort ég verð í kjósendahópnum er önnur saga, en hvað sem tautar og raular og þrátt fyrir allar efasemdir mínar um stjórnmál og stjórnmálamenn hef ég sannfæringu fyrir því að Steingrímur J. Sigfússon hefur gert Íslandi og þjóð sinni mun meira gott en illt.

Og ábyggilega kemur að því að hann víki af þingi, annaðhvort fyrir Elli kerlingu ellegar þá fyrir ungri menntakonu með ferskar hugmyndir.“