Miðstjórn Sjálfstæðisflokksins hefur ákveðið að fresta landsfundi flokksins fram á næsta ár. Til stóð að halda landsfund 4. til 5. nóvember á þessu ári en í ljósi stöðunnar, vegna stjórnarslita og kosningabaráttunnar fyrir kosningarnar 28. október næstkomandi, hefur miðstjórnin ákveðið að fresta fundinum. Þórður Þórarinsson framkvæmdastjóri flokksins sagði í samtali við RÚV að einhugur væri innan flokksins að fresta landsfundinum til febrúar eða mars 2018.

Sjálfstæðisflokkurinn hefur verið án varaformanns frá fráfalli Ólafar Nordal og voru uppi vangaveltur í aðdraganda komandi landsfundar, áður en stjórnin féll, hver myndi bjóða sig fram í embættið. Hafa verið nefnd nöfn Unnar Brár Konráðsdóttur þingforseta, Þórdísar K.R. Gylfadóttur iðnaðarráðherra og Áslaugar Örnu Sigurbjörnsdóttur ritara Sjálfstæðisflokksins. Búast má við því að Bjarni Benediktsson bjóði sig fram til áframhaldandi formannssetu, sagði hann við fjölmiðla í kjölfar stjórnarslitanna að hann telji sig enn hafa verk að vinna.