Líf Magneudóttir, forseti borgarstjórnar Reykjavíkur og borgarfulltrúi Vinstri grænna, telur ekki að vopnaðir sérsveitarmenn geti breytt miklu ef ófremdarástand skapast eða hryðjuverk.

Mikil umræða hefur spunnist um aukinn viðbúnað lögreglu og sérsveitar á fjölmennum viðburðum hér á landi á undanförnu. Vegna aukinnar tíðni hryðjuverka gegn óbreyttum borgurum erlendis hefur Ríkislögreglustjóri sagt að lögregla hér á landi verði að tryggja öryggi borgaranna, jafnvel þótt það kunni að auka sýnileika vopnðaðrar löggæslu á stórviðburðum, t.d. hátíðarhöldum á 17. júní.

Líf hefur gagnrýnt þessar ráðstafanir lögreglu harkalega. Á fésbókinni segir hún:

„Sérsveitarmaður með byssu á engu eftir að breyta ef einhver hefur einbeittan vilja til að valda fólki skaða.“

Og hún bætir við:

„Nærtækara væri að setja saman teymi áfallastreitusérfræðinga eða hjálparsveitarmanna til að stíga inn í ófremdarástand og hryðjuverk. Gerði meira gagn en sérsveitarmaður með byssu.“