„Ég held að öflugar almenningssamgöngur verði næstu áratugina og 21.öldina, mjög nauðsynlegar og óhjákvæmilegar. Það er gríðarlegur mannfjöldi sem þarf að komast á milli staða, það eru 90 þúsund bílar í Ártúnsbrekkunni, þeir voru 25 þúsund árið 1987. Og það mun ekkert breytast, fólk þarf að komast á milli staða hvort sem það er sjálfkeyrandi bíll eða bíll með bílstjóra. Ef að 90 þúsund sjálfkeyrandi bílar væru í Ártúnsbrekkunni þá mun það ekki breyta neinu.“

Þetta sagði Hjálmar Sveinsson formaður umhverfis- og skipulagsráðs Reykjavíkurborgar í Morgunútvarpinu á Rás 2.

Frosti Sigurjónsson rekstrarhagfræðingur og fyrrverandi þingmaður sagði í fréttum Stöðvar 2 í síðstu viku að sjálfakandi leigubílar myndu taka yfir almenningssamgöngur með ógnarhraða á næstu árum sem þýddi að borgarlína og fluglest yrðu úrelt. Sagði hann sorglegt ef búið væri að eyða miklum fjármunum í almenningssamgöngur þegar allir myndu mæta á opnunina á sjálfkeyrandi ökutæki.

Því er Hjálmar ekki sammála og telur hann mikla þörf á öflugum almenningssamgöngum:

Það sem sjálfkeyrandi bílar munu að öllum líkindum gera er að gera mikinn fjölda bílastæða óþarfan inni á einkalóðum og við stóra vinnustaði. En þeir munu ekki minnka umferðina. Munurinn á plássi á sjálfkeyrandi bíl og venjulegum bíl er enginn í umferðinni, hins vegar er gríðarlegur munur á stórum vagni og bíl. Hann tekur 20 sinnum minna pláss. Þetta snýst um plássið á vegunum.