Ólafur Ólafsson kaupsýslumaður hefur birt á vefsíðu sinni 45 mínútna myndbandsgreinargerð þar sem hann skýrir sína hlið á einkavæðingu á hlut ríkisins í Búnaðarbankanum í ársbyrjun 2003.

Síðar í dag kemur Ólafur fyrir stjórnskipunar-og eftirlitsnefnd Alþingis vegna skýrslu rannsóknarnefndar Alþingis um einkavæðingu bankans, þar fær Ólafur 15 mínútur og því hefur hann ákveðið að birta framsögu sína í heild á netinu.

Var það afdráttarlaus niðurstaða rannsóknarnefndarinnar, sem greint var frá í lok mars síðastliðnum, að almenningur, fjölmiðlar og stjórnvöld hafi skipulega verið blekkt í aðdraganda og kjölfar sölu Búnaðarbankans árið 2003.

Sjá frétt: Stjórnvöld, fjölmiðlar og almenningur blekkt

Segir á vefsíðu Ólafs að markmiðið sé að varpa skýrara ljósi á aðdraganda og umgjörð aðkomu þýska bankans við söluna á 45,8% hlut ríkisins í Búnaðarbankanum í ársbyrjun 2003. Segir Ólafur að við rannsóknina hafi hann aldrei fengið að sjá nein gögn til að tjá sig um né notið andmælaréttar, þrátt fyrir ítrekaðar óskir þar um.