Lionel Messi hefur hrósað ungstirni Barcelona, Lamine Yamal, í hástert og telur argentínska goðsögnin að spænski táningurinn geti orðið einn besti leikmaður heims á næstu árum. Messi segir jafnframt að Yamal minni sig á sjálfan sig þegar hann var að stíga sín fyrstu skref með aðalliði Barcelona.

Messi lét þessi orð falla á viðburði á vegum Adidas þar sem hann var spurður hvaða ungi leikmaður hefði heillað hann mest upp á síðkastið. Þar nefndi hann Yamal án þess að hika.

„Það er ný kynslóð af frábærum leikmönnum að koma fram, en ef ég þarf að velja einn vegna aldurs hans og framtíðarinnar sem bíður hans þá er það Lamine Yamal. Fyrir mér er hann sá besti og hann minnir mig á sjálfan mig þegar ég var ungur,“ sagði Messi.

Yamal hefur þrátt fyrir ungan aldur þegar slegið fjölda meta hjá Barcelona. Kantmaðurinn hefur spilað yfir 150 leiki fyrir félagið og skorað 49 mörk. Þá varð hann nýlega yngsti leikmaðurinn í sögu félagsins til að ná 40 mörkum í öllum keppnum og sló þar með met sem hafði staðið síðan árið 1915.

Í Meistaradeild Evrópu varð hann einnig yngsti leikmaðurinn til að skora tíu mörk eða fleiri í keppninni.