Wayne Rooney telur að Manchester United verði að ganga hratt frá ráðningu framtíðarstjóra félagsins ef liðið ætlar sér að styrkja hópinn fyrir næsta tímabil. Rooney óttast að óvissa á stjórastólnum geti haft neikvæð áhrif á möguleika félagsins á leikmannamarkaðnum í sumar.

United rak Ruben Amorim í janúar og síðan þá hefur Michael Carrick stýrt liðinu til bráðabirgða. Carrick hefur náð góðum árangri með liðið og tryggt því sæti í Meistaradeild Evrópu á ný, sem hefur aukið stuðning við að hann verði ráðinn til frambúðar.

Félagið hyggst fara í stórar breytingar í sumar og samkvæmt enskum miðlum gæti allt að 150 milljónum punda verið varið í að styrkja miðjuna. Rooney segir þó mikilvægt að leikmenn viti hver muni stjórna liðinu áður en þeir ákveða að ganga til liðs við félagið.

„Ef Manchester United vildi kaupa mig væri fyrsta spurningin mín hver stjórinn væri og hvort hann vildi fá mig,“ sagði Rooney í Match of the Day.

Rooney vill sjá Carrick fá starfið til frambúðar sem fyrst svo félagið geti hafið undirbúning fyrir næsta tímabil af fullum krafti. Carrick sjálfur segir umræðuna ekki hafa áhrif á sig og að hann einbeiti sér eingöngu að vinnunni með liðinu.