Útgáfufélag Fréttatímans verður fært til gjaldþrotaskipta. Starfsmenn hafa ekki fengið greidd laun fyrir mars en framhaldið verður í höndum skiptastjóra. Valdimar Birgisson, framkvæmdastjóri Fréttatímans, staðfesti þetta í samtali við mbl nú í morgun.
Fréttatíminn hefur ekki komið út síðan 7.apríl síðastliðinn og hefur vefsíða blaðsins ekki hreyfst síðan 8.apríl.
Starfsmenn hafa átt í deilum við Gunnar Smára Egilsson fyrrverandi ritstjóra og útgefanda blaðsins, lýsti Ingi Freyr Vilhjálmsson fyrrverandi blaðamaður því þegar starfsmenn hefðu ekki fengið borgað í byrjun apríl, Gunnar Smári hafi boðað forföll og starfsmenn hafi svo hlustað á hann í útvarpinu ræða afhverju það þyrfti að stofna Sósíalistaflokk á Íslandi.
Gunnar Smári hafnaði því að hann gengi frá blaðinu með verðmæti og að hann hefði rætt lengi um rekstrarvanda Fréttatímans, hann hefði reynt að safna fé án árangurs og þegar það hafi ekki gengið upp þá hafi lánadrottnar óskað eftir því að hann léti af störfum. Gunnar Smári sagði gjaldþrot Fréttatímans vera vont mál og komi sér illa fyrir marga, mestan fjárhagslegan skaða beri núverandi og fyrrverandi hluthafar:
Mestan tilfinningalegan skaða af þrotum blaðsins ber starfsfólkið sem þrátt fyrir að hafa lagt sig fram og gefið út frábært blað uppsker engan sigur og þarf að bíða uppgjörs á búinu eftir launagreiðslur, nokkrir vegna vinnu í mars, en aðrir til að fá laun út uppsagnarfrestinn. Því miður á ég ekki pening til að greiða þessi laun. Ég lagði restina af sparifé mínu í fyrirtækið fyrir þar síðustu mánaðamót til að borga launin þá.
