Jón Gunnarsson samgöguráðherra segir að ekki verði ráðist í nýframkvæmdir á vegi um Skógarströnd, Dynjandisheiði og á flughlaðinu á Akureyri á þessu ári. Búið er að boða tíu milljarða króna niðurskurð á samgönguáætlun sem var samþykkt skömmu fyrir kosningar síðasta haust. Hefur það verið harðlega gagnrýnt af þingmönnum, þar á meðal Gunnari Braga Sveinssyni þingmanni Framsóknarflokksins og fyrrverandi ráðherra, en ráðherra segir lítið svigrúm til nýframkvæmda. Kolbeinn Óttarsson Proppé þingmaður Vinstri grænna tekur undir með Gunnari Braga og segir ráðherra oft á tíðum láta eins og málið sé honum óviðkomandi:

Alþingi hafi jú samþykkt fjárlög sem ekki gerðu ráð fyrir nægum fjármunum í samræmi við samgönguáætlun. Allt satt og rétt, en hvað segja þeir 11 þingmenn sem 12. október samþykktu samgönguáætlun, með umtalsverðum útgjöldum, og samþykktu síðan fjárlögin 22. desember þar sem þau útgjöld voru skorin niður? Hvernig skýra þeir viðsnúninginn á 71 degi?

spyr Kolbeinn á Fésbókarsíðu sinni:

Kannski með því að annað var loforð fyrir kosningar, sem ekki þurfti að standa við?

Birtir hann þá mynd sem sýnir nafnalista þeirra sem samþykktu fjárlögin og hefur Kolbeinn merkt þá 11 þingmenn, þar á meðal Jón Gunnarsson samgönguráðherra, sem líka samþykktu samgönguáætlun 71 degi fyrr.

Rokkstjarna kallar ráðherra „dusilmenni“

Magni Ásgeirsson tónlistarmaður tekur undir með Kolbeini, gagnrýnir hann ráðherra harðlega og kallar hann „dusilmenni“:

Þú getur skilað til lágstvirksts Samgönguráðherra að hann sé dusilmenni fyrir þessi helvítis pennastrik sín. Fyrir fjármagn sem dugar varla til að sandmoka Landeyjahöfn í viku væri hægt að laga veginn um Berufjörð og klára að leggja veg á Borgarfjörð! En það sprungu ekki nema nokkrir tugir dekkja á þeim vegi síðasta sumar.