Ásta Guðrún Helgadóttir spyr hvort ríkisstjórnin ætli að læðast meðfram veggjum allt kjörtímabilið í stöðuuppfærslu á Facebook síðu sinni í dag. Ásta Guðrún er formaður þingflokks Pírata og þriðji þingmaður Reykjavíkur suður.

Sex vikur eru liðnar af þingi en ríkisstjórn Sjálfstæðisflokks, Viðreisnar og Bjartrar framtíðar tók við stjórnartaumunum þann 11. janúar síðastliðinn. Að sögn Ástu hefur stjórnarandstaðan ,,haldið uppi þingstörfum‘‘ á þessu tímabili.

Aðeins hafa verið flutt fjögur frumvörp af hálfu ríkisstjórnarinnar og fjórar stjórnartillögur. Þingmenn ríkisstjórnarflokkanna hafa flutt fjögur frumvörp og meirihluti velferðarnefndar hefur lagt fram eitt frumvarp.

Á meðan hefur stjórnarandstaðan flutt hvorki meira né minna en 11 frumvörp og 16 þingsályktunartillögur að sögn Ástu frá því að ríkisstjórnin tók við.

Ætlar ríkisstjórnin að taka þögnina og aðgerðaleysið á þetta kjörtímabil, læðast meðfram veggjum og vonast til þess að enginn taki eftir henni?

spyr Ásta.

Í athugasemdum við færsluna birtir Ásta tölfræði yfir það hvernig þingmannamál ríkisstjórnarflokkanna skiptast eftir flokkum. Þingmenn eins flokks eru áberandi duglegari en hinna tveggja við að leggja fram mál á þingi, þingmenn Viðreisnar og Bjartrar framtíðar hafa ekki lagt fram nein slík mál en þingmenn Sjálfstæðisflokks fjögur.

Þegar kemur að stjórnartillögum og frumvörpum hefur ekkert slíkt komið frá Bjartri framtíð, þrjú frá Sjálfstæðisflokki og fimm frá Viðreisn.