Mikið mæðir á Viðari Þorsteinssyni, framkvæmdastjóra Eflingar, í skugga yfirgripsmikilla verkfallsaðgerða í Reykjavíkurborg. DV ákvað því að leggja tarot fyrir Viðar og sjá hvað framtíðin ber í skauti sér. Lesendur geta síðan dregið sín eigin tarotspil á vef DV.
Fyrsta spil sem kemur upp er Æðsti prestur. Viðar er í vanda staddur og veit ekki alveg hvernig hann á að beita sér í þessum aðgerðum. Hann leitar því hjálpar hjá fagmanni. Kennari, lögfræðingur, skyldmenni eða vinur mun leiðbeina honum næstu daga og er honum ráðlagt að taka mark á ráðum viðkomandi. Viðar þarf að hlusta gaumgæfilega á ráðin en einnig huga að sinni eigin framtíð. Hann þarf að koma sér í réttan gír, tileinka sér annað hugarfar og halda áfram veginn. Hvort hann er á réttum stað þarf hann að gera upp við sig, en honum eru allir vegir færir ef hann vill feta nýja slóða.
Næst er það 8 stafir. Spilið táknar jafnvægi, félagslegt öryggi og veraldleg gæði sem Viðar getur notið. Viðar þarf að treysta á sjálfan sig og ekki gleyma innsæinu, sem segir honum að í framtíðinni sé honum ætlað stærra hlutverk en það sem hann sinnir í dag. Varðandi núverandi verkfallsaðgerðir þá virðist enginn endir í sjónmáli en málið tekur stökkbreytingum á stuttum tíma og allt leysist. Hlutirnir verða eins og Viðar vill hafa þá og allar óskir hans verða uppfylltar.
Loks er það 9 mynt. Viðar er þannig manneskja að hann kýs að vera einn endrum og eins. Eiga stundir með sjálfum sér. Hann er alls ekki þjakaður af einmanaleika og kann vel að meta gæðastundir með sjálfum sér þegar þessari holskeflu verkfalla er lokið. Hann hefur lagt mikið á sig til að komast á þann stað sem hann er á í dag. Nú þarf hann að njóta og ekki eyða tíma í óþarfa áhyggjur. Hugsanlega breytir hann um starfsvettvang í nánustu framtíð, en það tækifæri felur í sér góð laun og öryggi.
