Þó Newcastle vilji alls ekki selja Alexander Isak frá sér í sumar er félagið farið að skoða kosti sem gætu leyst hann af ef félagið nær ekki að halda honum.

Isak er að eiga ótrúlegt tímabil og raðar inn mörkum. Sænski framherjinn hefur til að mynda verið orðaður við Arsenal, Barcelona, Paris Saint-Germain og Liverpool undanfarið.

Eins og áður hefur komið fram vill Newcastle ekki selja sinn besta mann og ef hann fer verður það fyrir mjög háa upphæð.

Football Insider segir frá því að félagið horfi til Victor Boniface hjá Bayer Leverkusen ef Isak fer í sumar. Chelsea hefur þó einnig áhuga og gæti því orðið samkeppni um sóknarmanninn.