Það er hljómsveitin FLOTT sem bar sigur úr býtum í Jólalagakeppni Rásar 2 þetta árið með lagið Ó, Grýla taktu þér tak. Lagið er samið af Ragnhildi Veigarsdóttur og Vigdísi Hafliðadóttur og er vísun í jólalagið Ó, Grýla sem Ómar Ragnarsson gerði frægt á sínum tíma. Lagið er ákall til Grýlu með von um að hún breyti viðhorfi sínu til barna.

Ragnhildur tók við verðlaununum í beinni útsendingu í Popplandi á Rás 2 og ræddi aðeins við Lovísu Rut Kristjánsdóttur og Sigurð Þorra Gunnarsson um tilkomu lagsins. „Þetta er alveg ótrúlega skemmtilegt. Ég var eiginlega komin í jólagírinn í ágúst þegar við byrjuðum að semja þetta lag,“ segir Ragnhildur.

Í þriðja sæti var svo lagið Blankur um jólin með ÞESAL og í öðru sæti var Kjalar með lagið Stúfur.

Ragnhildur segist hafa búið til undirspilið fyrir að verða tveimur árum og þá hafi Vigdís fengið þá hugmynd að nota það í jólalag sem hún vildi að fjallaði um Grýlu sjálfa. „Lag sem stendur með börnunum, segir henni að hætta að borða lög – sem er kannski hægt að túlka á mismunandi hátt í samfélaginu í dag,“ segir Ragnhildur.

Ó, Grýla taktu þér tak er fyrsta jólalagið sem FLOTT sendir frá sér en Vigdís gaf einnig út jólalagið Hleyptu ljósi inn með Vilhelm Netó á dögunum. „Ég mæli mikið að allir kíki á það líka,“ segir Ragnhildur. „Hún hélt aðeins framhjá okkur.“ Það er ábreiða af gömlu lagi en Ó, Grýla taktu þér tak er frumsamið.

Lagið hefur þó fengið nýjan boðskap og segist Ragnhildur vona að það falli vel í kramið hjá krökkunum. „Við vorum að reyna miða við börnin en líka hafa þetta þannig að fullorðið fólk myndi líka vilja hlusta.“

FLOTT munu flytja lagið í beinni útsendingu á RÚV í þættinum Vikan með Gísla Marteini annað kvöld. „Við erum mjög spenntar fyrir því,“ segir Ragnhildur. Það verði þó að koma í ljós hvort Grýla láti sjá sig líka.