Bjarki var gestur í Fókus, spjallþætti DV. Brot úr þættinum má horfa á hér að neðan, smelltu hér til að horfa á hann í heild sinni eða hlusta á Spotify.
„Ég var mjög hræddur krakki frá 1. til 7. Bekk, þá var ég mjög hræddur. Mér var strítt mikið. Ég var smá rjómabolla. Það bjargaði mér að ég átti tvo eldri bræður, þannig ef mér var strítt, sem var reyndar mjög oft, þá mættu þeir stundum upp í skólann og voru í hótunum,“ segir hann.
Sjá einnig: Bjarki fór í magaermi á fjórða degi vöku – „Ég var frekar til í að deyja en að vera feitur“
Sumarið á milli sjöunda og áttunda bekkjar breytti öllu, þá tók Bjarki út mikinn líkamlegan þroska. Hann mætti í unglingadeild talsvert hærri en áður og mjög reiður eftir allt sem hafði á undan gengið.
„Ef einhver sagði eitthvað þá langaði mig að beita ofbeldi, og ég beitti ofbeldi margoft. Ég var eiginlega einn af eineltisseggjunum á vissum tímapunkti í lífi mínu,“ segir hann.
Bjarki átti erfitt með að einbeita sér í tímum og segir að í dag hefði hann örugglega verið sendur í greiningarferli fyrir ADHD. En á þessum tíma var hann bara óþekkur.
„Ég skildi ekki krakka sem gátu setið og lært. Þó mig langaði það sjálfur. Ég var með fínar einkunnir frá 1.-7. bekk en síðan sagði ég eiginlega: Fokk it, sko. Ég byrjaði að brjótast inn í skólann og stela peningum, ég byrjaði að drekka í áttunda bekk og notaði amfetamín í fyrsta skipti í áttunda bekk.“
„Ég var bara svo ógeðslega reiður út í lífið, frá svona fjórtán ára til tvítugs,“ segir Bjarki.
Sjá einnig: Tárast þegar hann heldur á dóttur sinni – „Ég átti ekki að geta það“
Aðspurður hvað hafi verið þar að baki, hvað hafi spilað inn í þessa miklu reiðir segir Bjarki:
„Ég er búinn að vera feitur allt mitt líf og ég trúi því ekki, eftir að hafa upplifað það, að manni getur liðið vel þegar maður er feitur. Ég var bara ógeðslega reiður út í sjálfan mig, ég var með litla sjálfsvirðingu, þegar ég horfði í spegil þá hugsaði ég: „Gaur, ég hata þig. Þú ert ógeðslegur.“
Það byggði upp meira… ég þurfti að sanna mig á einhverju sviði. Vera einhvers staðar harður, ég gat verið harður í einhverju partýi en svo þegar ég kom heim þá var ég lítill í mér og fór kannski að grenja.“
Undir lok grunnskólagöngunnar var Bjarka alveg sama, hann mætti í samræmdu prófin og teiknaði typpi á öll svörin og labbaði út. Hann fór samt í framhaldsskóla og byrjaði á fallbraut. Hann segir að það hafi verið það sem jafnaldrar hans og vinir hans voru að gera, þannig hann ákvað að fylgja hópnum en gekk illa.
Bjarki hafði klárað níu einingar eftir sjö annir. Hann var að lokum rekinn úr skólanum en mætti samt alltaf til að halda leikritinu gangandi fyrir foreldra sína, fór bara inn á bókasafn til að horfa á sjónvarpsþætti í tölvunni og hitta vini sína.
Bjarki ræðir þetta tímabil nánar í spilaranum hér að ofan. Hann fer yfir alla sögu sína í Fókus, sem má horfa á í heild sinni hér eða hlusta á Spotify.
Fylgdu Bjarka á Instagram og smelltu hér til að fylgja Götustrákum og horfa á þættina.
