Björn Bjarnason segir ömurlegt af Ögmundi Jónassyni að hvetja íslensk stjórnvöld til að skipa sér í lið með einræðisstjórnum en skorast undan því að styðja Úkraínumenn í baráttu sinni við innrásarlið Rússa. Sakar hann Ögmund um að líta fram hjá innrás Rússa í skrifum sínum þar sem fjárveitingar til Úkraínu eru harmaðar.
Þetta skrifar Björn í grein í Morgunblaðinu í dag þar sem hann gagnrýnir harðlega grein Ögmundar í sama blaði frá því á þriðjudag. Báðir menn gegndu embætti dómsmálaráðherra á sínum tíma.
„Vladimír Pútín Rússlandsforseti gaf fyrirmælin um tilefnislausa og ólögmæta innrás í Úkraínu. Hann rauf friðhelgi landamæra nágrannaþjóðar, hún ætti engan tilverurétt og lyti stjórn nazista sem yrði að afvopna og uppræta. Síðan hefur Pútín verið lýstur stríðsglæpamaður,“ segir Björn. „Ögmundur Jónasson, fyrrverandi ráðherra, kýs að hlaupa yfir þetta upphaf stríðs í Evrópu í grein hér í blaðinu 6. ágúst.“
Vísar Björn í grein Ögmundar sem bar yfirskriftina „Hávamál eða Eysteinn?“. Þar fór Ögmundur í löngu máli um hversu slæmt það væri að borga undir „vígvæðingu“ í Úkraínu.
„Ekki er aðeins dapurlegt heldur mjög ámælisvert hve þjóðir Evrópu láta vopnaiðnaðinn teyma sig gagnrýnislaust í fjáraustri til hernaðar og taka sér stöðu á landamærum Rússlands og Vesturlanda; og nú er krafan sú að fá þangað kjarnorkuvopn,“ sagði Ögmundur í greininni.
Gagnrýndi hann stjórnvöld, meðal annars Lilju Alfreðsdóttur varaformann Framsóknarflokksins, fyrir að skilgreina óvini NATÓ sem okkar óvini, en hún vísaði í Hávamál því til stuðnings.
„En þá spyr ég hvort við þurfum ekki að grafast fyrir um hversu réttlátir þessir meintu vinir okkar hafi verið gagnvart veikburða og fátækum þjóðum og þá einnig hvort allir óvinir þeirra og jafnvel vinir óvina þeirra séu óverðugir vináttu okkar?“ sagði Ögmundur.
Björn bendir á að aðgerðir Vesturveldanna séu ekki úr lausu lofti gripnar. Rússar hafi átt upptökin af ófriðinum. Þeir ógni nú ekki aðeins fyrrverandi leppríkjum sínum, heldur einnig Finnum og Svíum.
„Óupplýstur lesandi á sem sagt að trúa því að í þágu vopnaframleiðenda leggi vestrænar lýðræðisþjóðir Úkraínumönnum lið við landamæri þeirra og Rússlands,“ segir Björn um grein Ögmundar þar sem ekkert var rætt um innrás Rússa inn í Úkraínu í febrúar 2022. „Í ríki Pútíns mega menn tala um „sérstaka hernaðarlega aðgerð“ Rússa þegar þeir ræða stríðið í Úkraínu. Ögmundur notar ekki einu sinni þau orð þegar hann segir okkur samtímasöguna frá sínum sjónarhóli.“
Björn nefnir að efnahagsstjórn Rússlands og ráðstöfun á opinberu fé ráðist nú alfarið af þörfum innrásarliðsins í Úkraínustríðinu, að skortur á mannafla og gögnum megi ekki hindra sigur Rússa.
„Ögmundur sér ofsjónum yfir því að vestrænar þjóðir með NATO-ríkin í forystu leggi 38 milljón Úkraínumönnum lið gegn 144 milljón Rússum. Hann fjargviðrast einnig yfir því að efnahags- og atvinnustefnu innan ESB eigi að laga að hergagnaframleiðslu til að bregðast við hervæðingu allra þátta rússnesks þjóðlífs í þágu stríðsins,“ segir Björn.
Segir hann stuðningsmenn Rússa nú óttast að það sama gerist og þegar Sovétríkin leystust upp. Það er að rússneska sambandsríkið leysist upp sem samstæð heild undir álagi stríðsins.
„Í þremur ríkjum sitja nú forsetar sem telja sig hafa lýðræðislegt umboð þjóða sinna í kosningum þótt óvilhallir aðilar segi að þá stjórna í krafti kosningasvindls. Þetta eru Vladimír Pútín í Rússlandi, Alexander Lukasjenko í Belarús og Nicólas Maduro í Venesúela. Í liði með þessum mönnum eru stjórnendur Kína, Norður-Kóreu, Írans, Kúbu og Nígarakva,“ segir Björn. „Það er ömurlegt að íslensk stjórnvöld séu hvött til að skipa sér með þessum einræðisstjórnum og skorast undan að styðja Úkraínumenn.“
