Íslendingar eiga að geta staðið fremstir meðal þjóða þegar kemur að málefnum barna og ungmenna, rétt eins og við stöndum fremstir í jafnréttismálum. Baldur Þórhallsson segist finna fyrir því að fólki um allt land finnist það afskipt og elur með sér þann draum að landið og þjóðin geti aftur litið á sig sem eina heild. Baldur er gestur Ólafs Arnarsonar í sjónvarpsþætti á Eyjunni í aðdraganda forsetakosninga. Þáttinn má nálgast á Eyjunni, á hringbraut.is og á Hringbrautarrás Sjónvarps Símans. Einnig má hlusta á hann sem hlaðvarp.

Hér er brot úr þættinum:

Eyjan - Baldur Thorhallsson - 1.mp4

„Minn draumur er að landið og þjóðin geti aftur litið á sig sem eina heild, að við lítum á okkur sem eina heild bæði þegar kemur að samgöngumálum, kemur að atvinnumálum, heilbrigðis-, mennta- og menningarmálum því ég hef upplifað það núna á ferðalögum okkar um landið, en ég sagði það strax í upphafi baráttunnar að ég vildi verja þremur til fjórum vikum úti á landi til þess að heyra hvað fólk hefur að segja um embættið og hvað ætti að gera,“ segir Baldur.

Hér er þátturinn í heild:

HB_EYJ105_NET_BÞ.mp4

„Ég heyri hvað fólki finnst það vera afskipt hvar sem maður kemur á landinu. Það er ekki að upplifa lengur landið og þjóðina sem eina samfellda heild. Þarna held ég að við getum gert miklu betur og við höfum hvað þetta varðar t.d. forgangsraðað ákveðnum málum – málefnum barna og ungmenna. Við höfum sagt að börnunum eigi að geta liðið betur í íslensku samfélagi, öll börn eigi að fá tækifæri til að vera það sem þau eru og njóta hæfileika sinna.“

Baldur segir að honum þyki mikilvægt að nýta forsetaembættið þannig að hægt sé að láta gott af sér leiða og taka t.d. á því gríðarlega vandamáli sem ungt fólk stendur frammi fyrir í dag. „Það hefur aldrei verið meiri vanlíðan meðal ungs fólks, fíkniefnavandinn er mjög erfiður og ég á mér þann draum að við getum staðið fremst meðal þjóða þegar kemur að málefnum barna og ungmenna, rétt eins og við stöndum fremst meðal þjóða þegar kemur að jafnréttismálum.“