Kelsey Henson, hin kanadíska eiginkona Hafþórs Júlíusar „Fjallsins“ Björnssonar, svaraði nýlega einni algengustu spurningunni sem hún fær varðandi hjónabandið. Það er varðandi hvernig þau Hafþór fara að því að kyssast.

Kelsey svaraði spurningunni í beinu streymi á samfélagsmiðlinum Instagram þar sem fylgjendur fengu tækifæri til að spyrja hana að öllu milli himins og jarðar.

Ástæða þess að margir velta þessu atriði fyrir sér er hæðarmunurinn á hjónunum. Hafþór er 206 sentimetrar á hæð en Kelsey 157 sentimetrar. Þarna þarf að brúa bil upp á um hálfan metra. Langtum stæra bil en flest pör þurfa að takast á við.

„Hann beygir sig. Ég stend á tánum. Eða að ég segi: Fjandinn hafi það, lyftu mér upp!“ sagði Kelsey í streyminu.

Forvitni netverja um einkalíf hjónanna var þó ekki að fullu svalað með þessu svari.

„Hvernig þau kyssast. Umm, já, það var einmitt það sem ég var að velta fyrir mér….“ sagði einn. „Neibb, raunverulegu spurningunni var ekki svarað!“ sagði annar.