Gríðarlega óvænt nafn gæti verið valið í næsta landsliðshóp Englands sem undirbýr sig fyrir keppni á EM í sumar.

Daily Mail greinir frá en maðurinn umtalaði er Jack Butland sem er þrítugur að aldri í dag.

Butland leikur með Ranges í Skotlandi og hefur staðið sig vel en hann er þekktastur fyrir tíma sinn hjá Stoke.

Butland vakti mikla athygli í ensku úrvalsdeildinni á sínum tíma og lék níu landsleiki fyrir England frá 2012 til 2018.

Gareth Southgate, landsliðsþjálfari, er að horfa til Butland sem gæti verið valinn sem þriðji kostur í næsta hóp.

Aaron Ramsdale fær ekkert að spila með Arsenal, Nick Pope er frá vegna meiðsla út mars og Sam Johnstone hefur misst sæti sitt hjá Crystal Palace.

Butland hefur ekki spilað landsleik í sex ár en hefur hrifið marga með frammistöðu sinni í Skotlandi í vetur.