„Ef þau verða ekki búin að taka til í sínum ranni þegar þing kemur saman á mánudaginn, þá munum við leggja tillöguna fram,“ segir Inga Sæland, formaður Flokks fólksins, í Morgunblaðinu í dag.

Inga og Sigmundur Davíð Gunnlaugsson, formaður Miðflokksins, ætla að leggja fram vantraust á Svandísi Svavarsdóttur matvælaráðherra þegar þing kemur saman eftir helgi. Breytir þá engu þótt hamfarir hafi orðið í Grindavík á dögunum og ærið verkefni sé fram undan þar.

„Við erum eftir sem áður harðir á því að leggja fram vantrauststillöguna við fyrsta tækifæri, en við ætlum að meta um helgina hvort það verði einhver neyðarlög vegna hamfaranna í Grindavík sem þarf að keyra í gegnum þingið á skömmum tíma, þá myndum við hleypa þeim fram fyrir,“ segir Sigmundur við Morgunblaðið.

Inga segist ekki vita hvort tillagan muni ná fram að ganga en til þess þyrfti stuðning þingmanna Framsóknarflokks eða Sjálfstæðisflokks.

„Það verður alveg jafn erfitt fyrir Sjálfstæðismenn að verja hana vantrausti núna, jafnvel þó þetta gos hafi orðið við Grindavík. Það hefur ekkert breyst í þeirra huga að matvælaráðherrann braut lög.“