Lögregla hefur til rannsóknar atburð sem varð í þorpinu Brockham í Surrey-sýslu í Englandi að kvöldi 4. nóvember síðastliðins. Þá var skorið á dekk 32 bíla í þorpinu.

Lögreglan hefur óskað eftir upptökum úr eftirlitsmyndavélum og hvatt vitni til að gefa sig fram.

Birtar hafa verið myndir á samfélagsmiðlum af dekkjum sem hafa verið skorin. Bílunum var lagt í mismundandi götum að sögn lögreglunnar.

Lögreglumenn fóru þegar á vettvang þegar tilkynnt var um skemmdarverkin. Talið er að þau hafi átt sér stað frá klukkan rúmlega sjö til hálf tíu um kvöldið.

Einn íbúi í þorpinu birti myndband á Facebook af óþekktum manni beygja sig niður að dekkjum bifreiðar og skömmu síðar heyrðist hljóð sem líktist lofti að leka út. Maðurinn sagði myndbandið ekki vera í góðum gæðum en vonaði að einhver gæti borið kennsl á manninn óþekkta.

Talið er mögulegt að skemmdarverkin tengist á einhvern hátt því að þetta kvöld var brenna í þorpinu. Var hún í tilefni af degi Guy Fawkes sem er 5. nóvember á hverju ári í Bretlandi. Er þess þá minnst að manni að nafni Guy Fawkes mistókst að sprengja þinghúsið í loft upp þennan sama dag árið 1605.

Einn íbúi þorpsins segist ekki vera viss um að brennan hafi eitthvað með skemmdarverkin að gera. Áður hafi fólk, á öðrum tímum ársins, keyrt um þorpið og brotið bílrúður með hamri.

Annar íbúi sagði að nokkuð hafi verið um skemmdarverk á síðustu árum í þorpinu. Bílrúður hafi verið brotnar og skotið hafi verið úr loftbyssum á bíla og rúður í íbúðarhúsum. Hann telur þessi nýjustu skemmdarverk ekkert tengjast brennunni en að líklegt sé að einstaklingur sem búi á svæðinu og eigi í miklum vanda með sjálfan sig standi fyrir skemmdarverkunum.

Einn íbúa er þó ósammála og telur að brennan og samkomuhald henni tengdri hafi farið algjörlega úr böndunum. Hann segir að selja ætti takmarkaðan fjölda miða á brennuna en ekki hafa opinn aðgang. Íbúar sé löngu orðnir þreyttir á að hlutum sé stolið úr görðum þeirra, bílum lagt í innkeyrslurnar þeirra, tómum bjórdósum og hávaða sem fylgi samkomunni. Hann segir að skipulagsnefnd brennunnar ætti með réttu að greiða fyrir þá hjólbarða sem skornir voru á bílunum 32.

Sky News greindi frá.