Það má ekki gleymast þegar rætt er um virkjanir og virkjanaframkvæmdir að margar helstu náttúruperlur landsins eru til komnar vegna virkjana, auk þess sem vegakerfið á Íslandi hefur að verulegu leyti byggst upp vegna virkjanaframkvæmda, segir Jón Karl Ólafsson, fyrrverandi forstjóri Icelandair. Hann er gestur Ólafs Arnarsonar í hlaðvarpi Markaðarins.

Markaðurinn - Jón Karl Ólafsson - 3

„Það eru allir staðir fallegir,“ segir Jón Karl. „Ég er búinn að koma víða við, var formaður SAF í sex ár eða svo. Ég var þá oft með fundi þar sem menn voru reiðir og spurðu: Af hverju komið þið ekki með ferðamenn hingað? Ég móðgaði menn oft með því að segja: Af hverju ættu þeir að koma? Þá urðu menn mjög reiðir og sögðu: Hvað ertu að koma hér með svona dónaskap? Mitt svar var að segja: Þið eruð alveg að misskilja spurninguna. Ef þið getið ekki svarað þessari spurningu getur ferðamaðurinn ekki svarað henni.

Málið snýst einfaldlega um það hvað er það sem þið eruð að selja. Þá voru svörin oft og tíðum: ja, við erum með hótelið hér og við erum með þetta og hitt. Ég sagði, já, já, en þetta eru allt saman afleiðingar. Það eru engin hótel á t.d. Austurlandi sem eru þannig að fólk segi við sjálft sig, ég varð að fara til Íslands til að sofa á þessu hóteli. En hins vegar eru gríðarleg tækifæri. Á Austurlandi erum við með stærstu manngerðu stíflu í Evrópu, þar er komin mjög falleg leið í kring og þetta fallega stuðlagljúfur sem er beinlínis orðið til vegna framkvæmda.“

Jón Karl segir það oft gleymast þegar talað er um að banna hér virkjanir að þær séu mikill hluti af náttúruperlum Íslands. „Elliðavatn er bara uppistöðulón. Myndi einhver vilja losna við það í dag? Uppbygging vegakerfisins í landinu hefur verið mikið í kringum virkjanaframkvæmdir og fyrir vikið komast ferðamenn á staði sem þeir annars kæmust ekkert á. Menn þurfa auðvitað að sjá þessa hluti í samhengi.“