Kynjaveisla Birgittu Lífar Björnsdóttur og Enoks Jónssonar í gær hefur vakið mikla athygli, umtal og gagnrýni í dag.
Parið Birgitta Líf, markaðsstjóri World Class og Enok, sjómaður og iðnaðarmaður, eiga von á sínu fyrsta barni og í gær héldu þau kynjaveislu, þar sem kyn ófædda barnsins var opinberað. Í stað hefðbundinna slíkra veislna þar sem blaðra er sprengd eða kaka skorin tók parið tilkynninguna á hærra stig og leigði þyrlu sem flaug framhjá blokkum Skuggahverfisins í Reykjavík þar sem parið býr. Þyrlan dreifði síðan bláum reyk á meðan hún flaug yfir sjónum.
Sjá einnig: Birgitta Líf og Enok gagnrýnd fyrir að tilkynna kyn barnsins með þyrlu – „Vá hvað þetta er firrt hegðun“
Í frétt Mbl.is kemur fram að miðillinn hafi kannað hvað slíkt flug kosti og fengið þau svör að klukkutíminn kosti yfirleitt á bilinu 350 til 450 þúsund krónur. Þyrlan hafi flogið í alls sjö mínútur og þar af var hún í eina mínútu yfir sjónum. Samkvæmt því ætti flugið að hafa kostað á bilinu 41 til 52 þúsund krónur.
Andri Jóhannesson, þyrluflugmaður og hljóðmaður er maðurinn sem flaug þyrlunni í umrætt sinn, en hann starfar í fullu starfi sem flugmaður hjá Landhelgisgæslunni. Andri þvertekur fyrir að flugið fyrir Birgittu Líf og Enok hafa kostað hundruðir þúsunda.
„Þetta var örugglega ódýrasta þyrluflug sem ég hef flogið. Þetta var bara klink miðað við það sem ferðamenn og aðrir eyða,“ segir Andri í samtali við Viðskiptablaðið. Hann segist hafa verið rúmlega sjö mínútur í loftinu og að þyrlan hafi verið í hengiflugi yfir sjóinn í rúmar 40 sekúndur.
Athugasemdirnar hafa margir snúið að því hversu óumhverfisvænt flugið hafi verið. Líkt og sjá má í þessari athugasemd á X þar sem flestir rembast við að flokka og svo framvegis taki parið upp á splæsa í þyrluflug.
Á meðan flestir rembast við að flokka, nota bílinn minna, borða minna kjöt etc. heldur Birgitta Líf gender reveal með þyrlu. Eðlilega 🥲 pic.twitter.com/1MjQOHtIid
— Heklandi (@heklandi) September 17, 2023
Andri segir bláa reykinn ekki umhverfisspillandi. „Við notuðum bara svona gufu eins og er notuð í tæknibrellum í bíómyndum. Svo var henni sleppt og hún eyddist bara þarna yfir sjóinn og allt búið. Það sést líka þarna á myndunum að gufan nær ekki einu sinni til jarðar,“ segir Andri við Viðskiptablaðið. Segir hann þyrluna hafa verið allan tímann yfir sjónum með bláa reyknum eða gufunni var sleppt og að á þessum sjö mínútum hafi hann eytt rúmlega 20 lítrum af eldsneyti og fóru tæplega fimm lítrar í hengiflugið yfir höfnina.
Í athugasemdum við fréttina á Vísi spyr einn spurningarinnar sem er líklega á margra vörum, „Hvað þarf ég að nota mörg papparör til að vega upp á móti þessu?“ Annar svarar, en hvort útreikningurinn er réttur eða ekki látum við lesendur dæma um.
Það er þó rétt að geta að þó margir hafi í athugasemdum hneyklast á athæfinu þá eru líka margir sem óska verðandi foreldrum innilega til hamingju með drenginn.
