Bjarni Benediktsson talaði hreint út við fréttamenn á Bessastöðum  við ráðherraskiptin í gær. Hann sagði ríkið ekki lengur ráða við þann kostnað sem ásókn flóttamanna hingað til lands fylgir. Þingið hafi brugðist í því að styðja hugmyndir ráðherra um að koma skikki á málaflokkinn og leggja fram trúverðuga stefnu.

Í nýjum náttfarapistli á Hringbraut  segir Ólafur Arnarson Bjarna hafa gert tvennt. Hann hafi sent Vinstri grænum kaldar kveðjur, „sýndi þeim fingurinn“ eins og vefmiðillinn Mannlíf orðaði það. Jafnvel megi túlka orð Bjarna svo að hann hafi verið að vísa Vinstri grænum á dyr í ríkisstjórnarsamstarfinu. Jafnframt hafi Bjarni verið að þakka Jóni Gunnarssyni vel unnin störf og sýna honum virðingu. Ljóst sé að Bjarna sé óljúft að missa Jón úr ríkisstjórn.

Ólafur bendir á að innan Sjálfstæðisflokksins sé öflugur hópur sem sé mjög ósáttur við þá breytingu sem varð á ríkisstjórninni þegar Jón vék fyrir Guðrúnu Hafsteinsdóttur. Þá svíði flokksmönnum að horfa upp á að Sjálfstæðisflokkurinn haldi formanni sósíalista í embætti forsætisráðherra þegar flokkur ráðherrans sé rúinn trausti og fylgi og kominn niður í 5,6 prósent fylgi í skoðanakönnunum.

Ólafur bendir á þann möguleika að Vinstri græn hverfi nú út úr ríkisstjórn og Miðflokkurinn komi í þeirra stað. Sú ríkisstjórn hefði 32 þingmenn, sem er minnsti mögulegi meirihluti, en sá meirihluti ætti að halda að mati hans.

Ólafur gerir því skóna að í slíkri ríkisstjórn myndi Bjarni Benediktsson setjast í forsætisráðuneytið og Sigmundur Davíð Gunnlaugsson verða utanríkisráðherra. Þórdís Kolbrún Reykfjörð Gylfadóttir færi þá í fjármálaráðuneytið og Jón Gunnarsson gæti komið á ný inn í stjórnina sem sjávarútvegs- og landbúnaðarráðherra (matvælaráðherra) og Brynjar Níelsson yrði áfram aðstoðarmaður hans.

Pistil náttfara má lesa í heild hér.