Skilaboð sem sögð voru hafa birst í hraðbanka í útibúi Landsbankans, þar sem grínast var með að Edda Falak hefði ekki unnið í bankanum, eru fölsuð. Þetta kemur fram í yfirlýsingu bankans vegna fyrirspurnar fjölmiðla.
Það var Fréttin.is sem vakti athygli á málinu en síðan birti myndskeið þar sem ónefndur maður kveðst hafa farið í útibú til að taka út pening og séð þá eftirfarandi skilaboð á hraðbanka bankans. „Edda Falak hefur aldrei starfað í þessum banka“. Skilaboðin eru tilvísun í fréttir síðustu viku um að Edda hafi ekki komið hreint fram varðandi starfsferil sinn og að hafa sagt ítrekað ósatt í viðtölum að hún hafi starfað hjá fjárfestingabanka í Kaupmannahöfn og orðið það fyrir áreiti.
Málið vakti mikla athygli, ekki síst í ljósi þess að Edda hefur veitt þolendum vettvang með hlaðvarpsþætti sínum Eigin konur sem og herferð á samfélags- og fréttamiðlum um að frásögnum þolenda yrði trúað. Edda starfar í dag sem blaðamaður á Heimildinni en þrátt fyrir að fyrsta málsgrein siðareglna blaðamanna sé á þá leið að sannleikurinn skuli hafður að leiðarljósi við slík svör ákváðu forsvarsmenn miðilsins að standa með henni og lýsa því yfir að málið myndi ekki hafa áhrif á störf hennar.
Það var ritstjóri Fréttarinnar, Margrét Friðriksdóttir, sem birti myndbandið falsaða á persónulegri Youtube-síðu sinni og hefur það vakið nokkra athygli nú í morgun.
Hér má sjá myndskeiðið falsaða
Landsbankinn brást síðan við með því að senda frá sér yfirlýsingu til fjölmiðla nú fyrir stundu þar sem áréttað var að um fölsun væri að ræða.
„Í dag hefur birst falsað myndskeið og fölsuð ljósmynd af hraðbanka Landsbankans. Á myndinni og myndskeiðinu er texti sem vísar til starfa nafngreindrar konu. Um er að ræða fölsun og að sjálfsögðu hefur slíkur texti aldrei birst í hraðbanka Landsbankans. Okkur þykir miður að einhver sjái sér hag í að vega að umræddri manneskju með þessum ósmekklega hætti.“
