Gamall draumur rættist hjá Tómasi Guðbjartsson, hjarta- og lungnaskurðlækni, um helgina, þegar hann náði 7 km háum tindi Aconcagua í Argentínu, hæsta fjalli utan Himalajafjalla.

Tómas hefur sérhæft sig í krefjandi fjallgöngum, en hann starfaði meðfram læknanámi við fjallaleiðsögn með erlenda ferðamenn um allt hálendi Íslands og lauk leiðsögumannaprófi vorið 1989.

Í færslu á Facebook birtir Tómas mynd af sér á tindinum og segir að honum hafi boðist að slást í ferð með níu bandarískum fjallgöngumönnum, en Ed Viesturs og Garret Madison leiddu hópinn.

„Þetta var heljarinnar puð, enda aðstæður óvenju erfiðar vegna mikilla snjóa. Því var gengið úr búðum 1 í búðir 2 og 3 á mannbroddum með ísöxi og svo áfram upp á snævi þaktan tindinn – og notast við línu í bröttustu brekkunum. Mestur tími fór í hæðaraðlögun og bera byrgðir upp og niður fjallið. Veður var kalt en frábært útsýni og illvígir sviptivindar, sem þekktir eru á Aconcagua, létu okkur að mestu í friði,“
Segir Tómas, sem hyggst birta myndir af leiðangrinum næstu daga, en hann var sambandslaus í 12 daga á fjallinu.

Hópurinn samanstóð af þaulvönu fjallafólki, tveir helltust þó úr lestinni í búðum þrjú, sem heita Camp Cholera, vegna veikinda. Tómas segist sjálfur hafa verið í miklu stuði, enda búinn að taka út heiftarlega magakveisu í grunnbúðum. „Ekki spillti fyrir að sl. vikur hef getað æft mig heima í fimbulkulda – og brodda kann ég vel við eftir áratuga reynslu af íslenskum jöklum. Tölfræðin er erfið á Aconcagua og tæplega 30% ná tindinum,“segir Tómas ánægður með ferðina.

„En um leið hugsi yfir þeim hættum sem svona há fjöll bjóða upp á. Í gær létust tveir á fjallinu, en þeir voru úr hópi sem var degi á eftir okkur. Öðrum tveimur varð fótaskortur neðan hátindsins í sl. viku og er vart hugað líf á gjörgæslu. Aconcagua er því heiljarinnar áskorun og maður lærir að þekkja sjálfan sig, undirbúa sig vel og taka réttar ákvarðanir við erfiðustu aðstæður. Fyrir lækni með áhuga á hæðarveiki var þetta síðan eins og tilraunastofa á áhrifum þunns lofts á mannslíkamann- því miður. Samt er gefandi að geta sem læknir komið svo mörgum til hjálpar á fjallinu, en efst geta þyrlur ekki flogið.“