Ríkisstjórn Talíbana í Afganistan hefur ákveðið að banna háskólamenntun kvenna í landinu. CNN greinir frá. Um er að ræða enn eitt skrefið sem yfirvöld í landinu hafa tekið til þess að skerða mannréttindi stúlkna og kvenna í landinu frá valdatöku Talíbana í ágúst í fyrra. Í mars á þessu ári bönnuðu yfirvöld stúlkum að sækja sér menntun um fram barnaskólastig.

Þórdís Kolbrún Reykfjörð Gylfadóttir, utanríkisráðherra Íslands, birti yfirlýsingu á Twitter-síðu sinni í gærkvöldi þar sem hún sagðist vera miður sín vegna ákvörðunarinnar. Um væri að ræða skammarleg ákvörðun og verið væri að níðast á rétti kvenna og stúlkna til að mennta sig.

Mannréttindasamtök hafa fordæmt ákvörðun ríkisstjórnarinnar og það hafa sömuleiðis bandarísk stjórnvöld gert. Með henni séu stjórnvöld í Afganistan að einangra sig enn frekar á alþjóða vettvangi

Talíbanar stjórnuðu Afganistan með harðri hendi á árunum 1996 til 2001 og brutu þá í hvívetna á mannréttindum stúlkna og kvenna. Þegar Talíbanar tóku svo aftur við valdataumunum á síðasta ári var hófsamari nálgun lofað en þau fyrirheit virðast ekki ætla að rætast.

Færsla utanríkisráðherra

Shocked and saddened by the deplorable decision of the Taliban to close universities for women in #Afghanistan. This violation of the right to education for women and girls is yet another shameful act against the people of the country.

— Þórdís Kolbrún Reykfjörð Gylfadóttir🇮🇸 (@thordiskolbrun) December 20, 2022