Þetta sagði Magnús Tumi Guðmundsson, prófessor í jarðeðlisfræði við Háskóla Íslands, í samtali við Fréttablaðið.
Að undanförnu hefur gosið tvisvar á suðvesturhorninu og margar virkar eldstöðvar eru komnar á tíma.
Aðspurður sagði Magnús að þau eldgos sem séu líklegust til að valda mestu tjóni séu Kötlugos eða stórt gos á Grímsvatnasvæðinu. Slík gos geti eyðilagt brýr og stóra vegarkafla og hraungos á Reykjanesskaga geti skemmt innviði. Slíkt geti gerst og muni sjálfsagt gerast á næstu áratugum eða árhundruðum.
Hann sagði einnig að ef stór gos verði með miklu hrauni og gasi geti þurft að rýma svæði. „Við getum ekki lokað augum fyrir því að þetta er möguleiki. En það er ekkert svona sem blasir við að sé yfirvofandi,“ sagði hann.
En eftir því sem ferðamönnum hefur fjölgað hér á landi eru meiri líkur á að fólk sé nærri eldstöðvum þegar gos hefst, til dæmis við Heklu, Kötlu og Öskju. „Áður fyrr var aldrei neinn uppi við Heklu þegar hún gaus. Í dag er fullt af fólki að ganga á Heklu á góðviðrisdögum,“ sagði Magnús.
