Þann 5. október var kveðinn upp dómur í máli gegn kaupendum fasteignar fyrir Héraðsdómi Reykjaness. Kaupendur að einbýlishúsi höfðu neitað að reiða af hendi lokagreiðslu við afsal eignarinnar, upp á rúmlega 2,1 milljón króna. Seljendurnir stefndu kaupendunum fyrir dóm og kröfðust þess að frá greiðsluna.
Kaupendurnir staðhæfðu að leyndir gallar hefðu komið fram á eigninni sem þeim hafði ekki verið skýrt frá. Var þar m.a. stuðst við skoðun og mat fagmanna. Þannig leiddi skýrsla rafvirkja í ljós að skipta þyrfti um allt rafmagn í húseigninni. Húsasmiður taldi að gera þyrfti verulegar úrbætur á eigninni vegna rakaskemmda.
Kaupendurnir sögðu seljendur hafa vanrækt að greina frá þessum göllum. Heildarkostnaður við endurbætur væru rúmlega 4,5 milljónir króna. Kusu kaupendurnir því að halda eftir afsalsgreiðslunni og áskildu sér rétt til að gera frekari kröfur á hendur seljendum hússins.
Seljendur hússins höfnuðu þessum málatilbúnaði með öllu, sögðu eignina hafa verið vandlega skoðaða fyrir kaup og gerð hefði verið grein fyrir öllum göllum. Auk þess drógu seljendurnir í efa þær matsgerðir sem kaupendurnir tefldu fram.
Það var niðurstaða dómsins að seljendur hefðu ekki fyllilega sinnt upplýsingaskyldu sinni og eru þeir því látnir bera tjónið að hluta. Voru kaupendurnir dæmdir til að endurgreiða seljendunum 1,4 milljónir króna en ekki 2,1 milljón sem farið var fram á. Hins vegar þurfa kaupendur fasteignarinnar að greiða seljendunum 1.750.000 kr. í málskostnað.
