Trans maður lét lífið eftir áverka sem hann hlaut er ráðist var á hann á gleðigöngu í Þýskalandi. Umrætt atvik átti sér stað í borginni Münster þann 27. ágúst.

Maðurinn var 25 ára og hefur aðeins verið nafngreindur í umfjöllun fjölmiðla með eiginnafni sínu, Malte. Árásin átti sér stað er Malte kom tveimur hinsegin konum í göngunni til varna eftir að karlmaður byrjaði að hreyta í þær fordómafullum ónotum. Brást maðurinn ókvæða við og rést á Malte og barði hann niður í götuna.

Í kjölfarið var Malte fluttur á sjúkrahús þar sem honum var haldið sofandi á meðan læknar reyndu að bjarga lífi hans.

Að sögn yfirvalda flúði gerandinn af vettvangi með öðrum aðila og hefur enn ekki tekist að hafa hendur í hári hans. Lögregla hefur gefið út lýsingu á gerandanum og óskað eftir að möguleg vitni gefi sig fram. Gerandanum er lýst sem karlmanni á aldrinum 18-20.

Sven Lehmann, umboðsmaður hinseginmála hjá þýsku ríkisstjórninni, segist sleginn yfir atvikinu. Hann skrifaði á Twitter: „Malte er látinn í kjölfar hatursárásarinnar á CSD Münster. Ég er í áfalli og hryggur. Sendi stuðning og samúð á fjölskyldu hans og vini. Ofbeldi gegn hinsegin fólki er ógn sem við verðum öll að rísa upp gegn.“

Nach einer Hassattacke beim CSD Münster ist #Malte verstorben. Ich bin fassungslos + traurig. Mein Beileid + tiefes Mitgefühl gilt seinen Angehörigen + Freund*innen. Gewalt gegen queere Menschen ist eine Bedrohung, der wir alle uns entgegen stellen müssen.https://t.co/J5JEWYAelQ

— Sven Lehmann (er/he) (@svenlehmann) September 2, 2022

Samtök lesbía og homma í Þýskalandi segja í yfirlýsingu: „Lögreglan í Münster og ríkislögreglan verða að lýsa því yfir sem fyrst að þetta sé transfóbísk ofbeldisárás og viðurkenna að þetta var glæpur með pólitískan ásetning. Þegar samfélagið okkar er ekki einu sinni öruggt á Christopher Street deginum [sambærilegt við hinsegin daga] þá fara hatursglæpir að hefta frelsi okkar. Lesbíur, hommar, tvíkynhneigt, trans, intersex, kynsegin og hinsegin fólk á þau grundvallar réttindi að lifa frjáls og örugg. Það er skylda ríkisins að tryggja og vernda þetta grundvallar frelsi.“