Mannréttindasamtök og aðgerðahópar hafa undanfarið sett mjög á oddinn kröfu um að þolendur ofbeldis verði ekki lengur vitni í eigum kærumálum heldur málsaðilar. Þær raddir eru háværar sem segja að fráleitt sé að líta á ofbeldisþola sjálfa sem vettvang glæps.

Brynjar Níelsson, aðstoðarmaður Jóns Gunnarssonar dómsmálaráðherra, ræddi þessi mál í Hlaðvarpi Þjóðmála og margt fleira.

Vikið var að því að skipan Jóns í embætti dómsmálaráðherra og síðan ráðning Brynjars í starf aðstoðarmanns hans hafi vakið mikla reiði í samfélaginu þar sem þeir séu álitnir vera talsmenn gamaldags og andfeminískra viðhorfa. Brynjar benti á að margt gott sé að gerast í málefnum brotaþola kynferðisofbeldis á þessum fyrstu mánuðum Jóns í embætti og í smíðum sé frumvarp sem stuðli að því að flýta málsmeðferð.

Brynjar telur hins vegar að bein aðild brotaþola að ofbeldismálum muni skaða réttarstöðu þeirra en ekki bæta. „Um leið og þú ert orðinn aðili máls er hætta á að framburður þinni hafi minna sönnunargildi. Þá ert þú orðinn hluti af málinu í stað þess að ríkisvaldið sjái um að afla upplýsinganna, afla sönnunargagnanna þá ert þú farinn sjálfur að garfa í þessu. Þá er það bara þannig að aðilaskýrslur hafa alltaf minna sönnunargildi en vitnaskýrslur, það eru allt aðrar skyldur sem vitni hefur,“ segir Brynjar í viðtalinu.

Brynjar segir að þessi mál séu borin undir færustu sérfræðinga til athugunar. „Þetta er ekki bara einhver geðvonska í mér, þetta er byggt á þeim sem til þekkja.“ – Segir hann að margar hugmyndir frá baráttuhópum verði skoðaðar við smíði nýs frumvarps um kynferðisbrotamál, en „við verðum að stíga varlega til jarðar í þessu.“

Viðtalið má hlusta á í spilaranum hér að neðan.