Uppákoma varð í beinni útsendingu á RÚV í kvöld þegar fram fór viðureign Verslunarskóla Íslands og Fjölbrautarskóla Suðurlands í Gettu Betur. Um var að ræða fyrstu keppni vetrarins í sjónvarpssal og var staðan í viðureigninni, þegar komið var að bjölluspurningum, 14-10 fyrir Versló.
Stutt hlé var á keppninni á meðan verið var að fara yfir vafaatriði úr hraðaspurningunum en þá rífur spyrill keppninnar, sjónvarpskonan Kristjana Arnarsdóttir, þögnina og óskar eftir því að farið verði auglýsingahlé.
„Ég verð að fá að setjast niður. Afsakið þetta, er hægt að gera smá hlé?“ spyr Kristjana og styður sig við dómaraborðið.
Í kjölfarið var klippt í skyndi yfir í auglýsingahlé sem varði í nokkrar mínútur.
Þegar skipt var aftur í sjónvarpssal var Kristjana á bak og brott en spurningahöfundur keppninnar, Sævar Helgi Bragason, hafði tekið hennar sess við spurningapúltið.
„Komið þið sæl aftur. Það er allt í góðu með Kristjönu, sem betur fer, það leið yfir hana en hún er í góðu yfirlæti hér baksviðs,“ sagði Sævar Helgi og tilkynnti að hann myndi hlaupa í skarðið fyrir Kristjönu sem spyrill viðureignarinnar.
Í kjölfarið hélt keppnin áfram og reyndu allir hlutaðeigandi að láta þessa óvæntu uppákomu ekki á sig fá.
Í umfjöllun RÚV um uppákomuna kemur fram að Kristjana hafi farið á slysadeild til skoðunar í öryggisskyni. Hún hafi verið að bíða eftir að röðin kæmi að henni um níuleytið í kvöld en liðið vel miðað við aðstæður.
