Dumitru Calin, maðurinn sem ákærður er fyrir manndráp af gáleysi og fyrir að hafa ekki komið manni í nauð til hjálpar, er Daníel Eiríksson lést af áverkum sem hann varð fyrir eftir samskipti sín við Dumitru, ræddi örstutt við DV í lok réttarhlés laust fyrir kl. 13 í dag.
„Ég er mjög sorgmæddur því þetta er mjög sorglegt mál,“ sagði Dumitru er blaðamaður spurði hann hvernig honum liði. Við hlið hans sat kærasta hans, Cassandra. Bæði voru snyrtileg, yfirveguð og vingjarnleg í viðmóti.
„Mér finnst ég vera saklaus,“ sagði Dumitru, „í hjarta mínu finnst mér ég vera saklaus,“ sagði Dumitru, en hann staðhæfir að atvikið hafi verið hræðilegt slys. Aðspurður sagðist Dumitru einnig vera vongóður um að dómarinn í málinu sæi þetta í sama ljósi og hann og myndi sýkna hann af ákærunni.
Þess má geta að Dumitru er einnig ákærður fyrri fjölmörg önnur brot, fíkniefnabrot og þjófnaðarbrot.
