„Við munum leyfa sölu á kannabis til fullorðinna,“ segir meðal annars í stefnuskrá nýrrar ríkisstjórnar Þýskalands en hana mynda Jafnaðarmenn, Frjálslyndir og Græningjar. Lögleiðing á sölu og neyslu kannabis í þessu næstfjölmennasta ríki Evrópu mun væntanlega hafa áhrif um alla álfuna og þá sérstaklega innan ESB .

Enn liggur ekki fyrir hvað felst nákvæmlega í lögleiðingu en Financial Times segir að bara það að afstöðunni til kannabis verði nú gjörbreytt muni breyta miklu.

Ef af þessu verður, verður Þýskalands fjölmennasta ríki heims til að lögleiða sölu og neyslu kannabis. En þessi leið hefur verið farin í öðrum ríkjum. Í Kanada hófst þetta ferli 2018 og í 18 ríkjum Bandaríkjanna og Úrúgvæ hefur sala á kannabis og neysla þess verið heimiluð.

Í Colorado var byrjað að leyfa neyslu og sölu kannabis 2012 og önnur ríki fylgdu síðan i kjölfarið, þar á meðal Kalifornía. Hin frjálslynda hugveita Cato segir að enn sé of snemmt að slá nokkru föstu um áhrif lögleiðingar í hinum ýmsu ríkjum á neyslu og afbrot en segir að núverandi tölur sýni ekki miklar breytingar.

Á móti hefur þetta haft miklar efnahagslegar afleiðingar. Bara í Colorado er talið að lögleiðingin skili ríkinu um 20 milljónum dollara á mánuði. Þetta eru líklega peningar sem hefðu annars endað í vösum glæpagengja sem stýrðu markaðnum áður.

Þýska ríkisstjórnin telur að lögleiðing kannabis muni skila ríkissjóði um 4,7 milljörðum evra á ári í formi beinna tekna og minni kostnaðar við baráttu gegn glæpamönnum.