Líkt og DV greindi frá í síðustu viku úrskurðaði Héraðsdómur Reykjaness að þinghald í nauðgunarmáli héraðssaksóknara gegn Jóhannesi Tryggva Sveinbjörnssyni verði opið. Var það brotaþoli í málinu sem krafðist þess að víkja skuli frá þeirri reglu að kynferðisbrotamál séu háð fyrir luktum dyrum.

Í gær staðfesti Landsréttur úrskurð Héraðsdóms.

Þá greindi DV einnig frá því fyrir helgi að dómarinn í málinu er enginn annar en Ingi Tryggvason, fyrrum formaður kjörstjórnar í Norðvesturkjördæmi, en öll spjót beindust að honum í kjölfar talningahneykslis í kjördæminu í kjölfar kosninganna fyrir rúmum hálfum mánuði síðan.

Í byrjun þessa árs var Jóhannes dæmdur í fimm ára fangelsi fyrir fjórar nauðganir en fórnarlömb Jóhannesar voru öll viðskiptavinir hans á meðferðarstofunni Postura. Þeim dómi var áfrýjað til Landsréttar og er nú til meðferðar þar. Þannig mun Jóhannes Tryggvi þurfa að svara fyrir brot sín, dæmd og meint, á tveimur dómstigum í einu.

Málin eru öll keimlík, en í máli fimmta fórnarlambsins, sem nú er rekið fyrir héraðsdómi er Jóhannesi gefið að sök að hafa misnotað það traust sem hún bar til hans starfa sinna vegna, en einnig nauðgun með því að hafa káfað á kynfærum konunnar, rassi og brjósti og sett fingur í leggöngum henni að óvörum.