Meðlimir þriggja helstu flokkana sem eru kenndir við hægristefnu hér á landi voru gestir í kosningaþætti Hringbrautar í kvöld. Það voru þau Óli Björn Kárason fyrir Sjálfstæðisflokkinn, Þorbjörg Sigríður Gunnlaugsdóttir fyrir Viðreisn og Karl Gauti Hjaltason fyrir Miðflokkinn.

Í þættinum spurði Sigmundur Ernir Rúnarsson þáttastjórnandi hann Óla Björn hvort að Sjálfstæðisflokkurinn væri í raun hefðbundinn krataflokkur, og hann sagði svo vera í ákveðnum skilningi.

Í kjölfarið talaði Óli um að það væri sjálfsagt að hér væri almannatryggingakerfi og að fólk ætti rétt á að fá hjálp í ákveðnum aðstæðum. Það varð til þess að Karl Gauti greip fram í: „Þessir flokkar eru allir á leiðinni til vinstri.“ sagði hann og bætti svo við: „Þess vegna lítið þið út fyrir að vera hægri flokkur.“

Þetta varð til þess að Óli Björn spurði Karl Gauta hvort hann væri ósammála einhverju sem hann hefði sagt þar á undan. „Nei, alls ekki, þið eruð bara að færast lengra til vinstri,“ svaraði Karl og stuttu seinna sagði hann „Þið eruð að færast til vinstri, þú varst að viðurkenna það.“

Óli svaraði með spurningu: „Ef þú ert sammála öllu sem ég segi, hvernig er þá hægt að halda því fram?“

„Sjálfstæðisflokkurinn er kominn mikið, mikið lengra til vinstri en fyrir tíu eða tuttugu árum. Þetta er augljóst Óli Björn. Þið eruð að kannski búnir að taka við hlutverki kratana, þeir voru heimilislausir.“ var svar Karls Gauta.

Í kjölfarið benti Óli á að Miðflokkurinn hafi ekki stutt tillögur Sjálfstæðisflokksins um skattalækkanir.

Þá fékk Þorbjörg Sigríður orðið og setti út á tal Sjálfstæðisflokksins um skattalækkanir og vitnaði í tölur frá OECD þess efnis að skattar hefði ekki lækkað hér á landi.

„Skattar á Íslandi eru háir. Sjálfstæðisflokkurinn hefur verið með fjármálaráðuneytið að mestum hluta frá árinu 1995. Þetta er niðurstaðan,“ sagði hún og bætti svo við henni þætti Viðreisn vera heilbrigðari hægri flokkur en Sjálfstæðisflokkurinn.